Mga Hurop-hurop Hali sa Itom na Notebook 1

Dai akong naisusurat, ta nag babasa pa ako. Agony & Ecstacy, pan duwang beses. Ngonian “Lives” ni Giorgio Vassari.

Yaon ako ngonian sa pig-aapod kong semestral break sa pagsurat. Pagkatapos ki sarong mayumukon na andar kan pagsurat, biglang mauubos o mapundo an itataram. Sa bakanteng an, mga libro an ibalingan ko. Basang garo gutom na hayop. Kun pwede sana nganing dai na magkaturog, magbasa sana. Kaso, malaen sana pag-isip-isipon na pagkatapos kan mga nabasa, dai akong narurumdom. Nagluya na an sakong hutok.

Dai akong maitataram ngonian. Habo ko nang mag-otro kan naitaram ko na. Muya kong makagibo ki bago. Pagmati ko naitaram ko na gabos. Dai ako nakaka-abante. Gusto kong makua an sarong magayon na boses na sakuyang magagamit na haloy. Sarong bagong boses. Bagong imahe o figurative language. Habo ko nang magtanog Ingles o Tagalog an mga gibo ko. Hain an totoong tanog o tingog Tabaco? Iyan an hahanapon ko.
*
26 anyos, tulong bulan pa 27 na. May sirbe daw an kaakian ko? Nagamit ko daw an lawas ki maray? Kusog, dai ka daw nasayang? May naabutan ako sa pag gibo? Habo ko man matapos an buhay na daing naginibong sarong bagay na mahaloy sa kinaban. Pride, ego kan gabos na artista? Maraot daw? An paghagad ki sarong istatwa kan sadiri sa plasa, maraot daw?

Gusto kong magbalik sa mga rason ko kan primero pa sana akong nagtutula: an maitao sa namumutan ko an sarong tula na mapaogma saiya: sa paagi kan pag-utob sa saiyang altar o bangko? Makaulok. Romantiko daw an na gibo? Korni, dapat kuspaan? Kan kita aki pa. Magabat sa daghan pag na-iisip—kan kita aki pa. Garo dalan na lingaw pasiring sa sarong sikretong salog. Ginibo gayod an mga nakaagi kan kita aki pa para pagpatagduan ki luha pag kita gurang na.
Dai ako masuway na an pundasyon kan sakuyang pagsurat yaon siyempre sa sakuyang pagka-aki. Ini an minapahigot sa sakuyang tikab pag mina balik sa pagrumdom. Orog sa gabos an sarong hapon na nag-aagaw an liwanag buda diklom, nakahigda ako sa malipot na sim kan atop mi nakahiling sa panganoron na nawawaran na ki puti.

“Dear Julie Pearl...Dear Julie Pearl...”

Dai ko na masabutan an kantidad kan sitwasyon na ito. Pero an rumdom ko pa iyo an ogma sa sakuyang daghan. Sain daw ginabot an ogmang ini? Naogma sa paghiling sa langit? Sa langit na pawara na an liwanag, may diit na dampog, ordinaryo?

Si Julie Pearl nabasa ko sa sarong magasin pang kolehiyo. Bako su surat an nakagakot sakuya sa giromdom na ini kundi su drawing kan sarong dakulaon na subo o perlas palibot kaini mga lumot kan dagat, sa laog kan perlas pandok ki sarong babayi (si Julie Pearl?) tapos sa baba kan drawing, nakatalikod na lalaki, nakahiling sa perlas.

Mga pagsulnop na arog kaini, nagsusulo-sulo ako sa harong mi sa Tayhi. Nakabukas na an mga ilaw kan ploresent sa mga harong. Pagkaaki ko ining pinadaba ko sa sakuyang laog mala sa pungaw na pigdadara o pigpapahiling kaini. Masiramon daw an mundo na ini. Gusto kong ikumo-kumo sa sadiri ko. An sakong kaakian. Dai ko daw ini nabubutasan.

Nagkapira naman na tula an naisurat ko, na piggagabot ko sa mundo na ini. An daing laog ming harong sa Tayhi, anas espasyo, buda madiklom na mga kwarto. Mga estanteng kahoy na naghahalon ki liwanag. Makintab na paril na malipot, para-pasa ki ngipon (kan kinabayuhan ako ni Taba, aki pa kami, kaya an ngipon ko tipak). Rumirom kan bumbilyang papula na sa ponder. Daing ribok, tuninong na lalong minapahewason sa dakulang harong.

Ini an pigpaparabisita ko. Garo puntod ki sarong gadan na kababata. Kan nabunyagan ako kan kinaban, kan luwas, pinamidbid sa mga kaamigo, sa mga babayi, sa gayon buda lawas, kan nahiling an luwas, luhay-luhay na ining nagadan. Astang namalisyahan ko na sana na pighahanap ko na siya.

Ini an parte sa utak ko na mahalnason pag ikaputan. Garo parong sanang minaagi an ritratong ini.

Tama na.

Enero 9, 2006. 9:25 P.M. Tapos na “Bends” Radiohead.