Haribol Suralista

Pùngaw
1
Ang kabangguihon tang ini
an mas minasuhay sa tuya.
Pigpaparumdom sakuya kan mga bituon
an satuyang pagitan.
Dumog an awot
na sakuyang pigtutukawan,
mala pasa an lipot kan tùnog
sa unit kan duros.
An bulan nakasabit
sa pispis kan biriran.
An silyab kaini samí
sa malinig na langitnon.
Isinubol baga ako kan pagka-uyam
sa ulay kan koryente
digdi sa natad
asin magpagkot nin sigarilyo.
Asin mahiling ko an asul na diklom
buda matuninungon an mga dahon.
Pirit na naman akong pig-aalsa
kan konstelasyong Orion
sa maniwang niyang abaga.
Dapat gayud na sakuyang ikanta
an namamatean ko, sa iya.
Sa pangingimigkimig kan mga bituon
aram kong naghehemate an mga tawong lipod
sa sirong kan sampalok.
Dai dapat ninda ako anohon, ta kaapil ko sinda.
Saro an samuyang puso sa pagpadaba sa matangá.
Ta digdi man sana baga sa mga oras na arog kaini
nadadangog an samuyang pagdágo.
An haldat kan samuyang daghan
mas minalanit pagbako nang mainit.
Mas marhay ka sakuyang ayam
ta ika may balukag, kaya mo na painiton
an saimong takig.
Pero ako na hubá sa lipot na arog kaini
sain mapaiplí?

2
Garo kita mga ayam sa bangui
dai nin hungok sa pagparong kan atí.
Pag kita mina hayá, napapasá an kadlagan
pero dai nin minapurot kan satuyang ginubot.
Pagkaaga kita man sana an natutunok
kan tiunay na tarom.
Dai lamang minatarakdag an mga bituon
pag tiapod ta.
Dai ta aram páno sáwudon an saindang
tataramon.

Kun gusto mo akong makua
ipiyong an saimong mata
asin humiling sa diklom.
Yaon mo ako diyan itinipon,
kinamadang paros na hinangos
mo sa hampang ko!

3
Minabulos an ngirit mong mga salog na dai nin katapusan.
Irugbá an pangá kan mga bulod, iluhó an mga kuweba.
Kaya ako inanod dai nin hungok, dai nin kusog na punduhon
an saimong pagguyod.

Idara mo ako sa lugar kun sain dai ako nin kamot,
dai naipipiyong an mata buda dakula an talinga.
Tigpaugom mo sakuya an kinában, sa sakuyang liwoy ipatunaw
sa pagrumdom pa sána ini kan saimong pangaran!

Ako baybay man sanang malumoy an daghan,
minarasay na dai nin túlang pag saimong iagihan.
Ako maiba sain mo man idara
basta an tubig mo makairiba.

4
May narurumduman siyang pandok pag siya minahiling sa bulan!
Siisay daw an masuwertehon na sulterong dai niya malingaw-lingawan?
Marhay pa ika Padangat, kairibahan mo an saimong padaba.
Saimong nahihiling an saiyang hawak sa atop kan mga dampog.
Bako siyang bungog sa mga pangadyion mo, an paghangos mo saiyang bestado.

Sa hagyanan kan saiyang sildang iatang mo an sadit mong daghan.
Ikurahaw an saiyang ngaran, dulot na magtarakdagan an mga bituon.
Sa diklom. Kun haen an mga nakukulugan nagsusuruksok. Sa awot ihinat
an saindang matanglay na mga liog sa pagtangad sa panginoron
kan saindong paghaprosan.

Padaba, nalulugadan ako pagbulanon.
Minadumig an sakuyang mata pag ini’o maliwanagon.
Ta aram kong dai naheras nin marhay an buot sabihon kan lumlom
sa lambang harong.
Itamong mo an diklom kan bangui, itamong mo gabos
dangan ibayaan akong nagtatakig
sa sálog.


Sa Bus Pa-uli Hali Sa Katorse Kan Mga Puso Sa Legaspi
Mariraw kun anion ka
kuta may pagkot an mga aninipot
ngonian.
Pauli an bus sa hinalian mo, ta.
Nakalunad sakuya an magabat na buot
kun nata ako anion pa?
Aram ko man an muya ko: bako digdi
kundi baga sa taning mo.
Nata daw ta nagpawalat ka sa Legaspi?
Ako man sa Tabaco mapauli?
Nata kaipuhang maging dipisil
an sakuyang paghali.

Makaskason an pasi kan luha
sa pisngi kan iluwas ko an payo sa paros
an mata iminuklat sa bangui.
Kun anion ka kuta
nata ta kaipuhan pang humiling
sa luwas, sa bintana?

Mariraw kun anion ka
kuta dai ako naghapot.

Panó nin ilaw an Tabaco
sa sakuyang pag-abot.
Sisay an saindang pigpaogma?
An mga pandok na dai nin gabat
sa hukol kan paduman, padigdi
minalagpas, minabalda parayo sakuya.
Makatakot hampangon an higdaan,
an bintana. Baka magparumdom kan mga nasa harayo.
Lalo na pagnakasírip nin bituon, páno na,
pigisip-isip ko, kun hanapon taka?



Bako Man Kami Para-isipon Pagbangui
Bako man daw kami para-isipon pagbangui
Pagtogdon kan manok, turog naman kami
Sa nanok pigsamba an mga bituon
Mga kagurangnan tang harayuon

Kan pag-abot kan koriyente
nakanuod na magdalan TV
Kaito bagang túnog ang hayahay
ngonian kun dai nanggad belintilador,
dai na mabubuhay.

Mauswag an makina sa nali
Asin kun hilingon sa harayo
mga patenteng puti
Garu baga nagrolosad na mga bituon
sa makasuriaw tang kabanguihon.